Drejtori ekzekutiv i “Dokufest”-it, Eroll Bilibani, ka mbetur jashtë “Berlinales” pasi që Ambasada gjermane ia ka refuzuar kërkesën për vizë. Ai në një intervistë për “Zërin” ka treguar arsyet e refuzimit të vizës, të cilat i konsideron si absurde dhe të pakuptimta.

Ambasada gjermane në Kosovë ia ka refuzuar vizën drejtorit të “Dokufestit”, Eroll Bilibani, ku dhe ia ka pamundësuar pjesëmarrjen në festivalin e njohur “Berlinale”. Drejtori i “Dokufestit” thotë se në arsyetimin e Ambasadës thuhet se ai nuk ka dhënë dokumente që dëshmojnë se ka mjete për qëndrimin në Gjermani, si dhe nuk kam dhënë dëshmi të kthimit në vendlindje. Për këtë çështje Bilibani thotë se i ka shkruar edhe Ulrike Lunaçekut

Zëri: A jua ka dhënë Ambasada gjermane ndonjë arsye për refuzimin e vizës pasi ju ishit pjesëmarrës në festivalin “Berlinale” edhe gjatë viteve paraprake?

Bilibani: Në fakt unë nuk isha aty, e kisha autorizuar kolegun tim që ta marrë pasaportën edhe ai më lajmëroi që është një letër brenda pasaportës dhe me tha se vizën ta kanë refuzuar. Ajo letra është standarde e tyre, në të cilën tregojnë arsyen se pse, ishte kjo arsyeja numër tre ku thotë që: nuk kam dhënë dokumente që dëshmojnë se kam mjete të mjaftueshme për qëndrimin tim në Gjermani dhe se nuk kam dhënë dëshmi të kthimit në vendlindje. E para është e vërtetë sepse unë zakonisht nuk e jap llogarinë bankare private kur aplikoj për viza, edhe në 7 vjetët e fundit kur kam aplikuar nuk i kam dhënë ato dokumente, por i kam dhënë vetëm llogarinë bankare të organizatës, sepse unë zakonisht udhëtoj për punë, është zyrtare, nuk po aplikoja për vizë turistike, besoj që kur aplikon për vizë turistike ndoshta të duhet dëshmi, por nëse aplikon për vizë afariste t’i mjafton të dëshmosh që organizata jote ka mjete për t’i mbuluar shpenzimet gjatë udhëtimit e shpesh në shumë raste neve na ndodh që të mbulohemi nga ato organizata, të cilat na ftojnë…